Перо Камиказа со 4 конци на глава, повреден на Кеј на Вардар
20/07/2026 12:10
Перо Камиказа со потрес на мозокот и четири конци по судир на велосипедската патека
Музичарот се здобил со повреди на Кејот на Вардар, а по лекарските прегледи најави дека наскоро повторно ќе се врати на велосипед
Познатиот македонски музичар Петар Георгиевски – Перо Камиказа се опоравува од повредите што ги здобил по незгода додека возел велосипед на Кејот на Вардар во Скопје. Во несреќата се здобил со потрес на мозокот, повреда на главата и повеќе нагмеченици.
За инцидентот самиот информираше преку објава на Фејсбук, посочувајќи дека се случил пред неколку дена, на околу стотина метри пред мостот „Аминта Трети“.
Судир на велосипедската патека
Според неговото сведоштво, додека се движел по велосипедската патека, рекреативец кој доаѓал од спротивната насока ненадејно го сменил правецот на движење без претходно да провери дали патеката е слободна, по што дошло до судир.
„Летав салто, па спринтериците изгледа тогаш се откачиле. Потрес на мозок, четири конци на главата, неколку нагмеченици, искршени очила, но велосипедот, за чудо, остана читав“, напиша Георгиевски.
Лекарите констатирале дека нема внатрешно крварење
Музичарот раскажа дека човекот кој учествувал во незгодата веднаш признал дека згрешил, му се извинил и останал покрај него сè до пристигнувањето на Итната медицинска помош. Потоа го придружувал и до Ургентниот центар, каде што останал додека не пристигнала ќерката на Георгиевски.
Во Клиничкиот центар му биле извршени компјутерска томографија и дополнителни прегледи. По направените испитувања, лекарите утврдиле дека нема внатрешно крварење, а повредата на главата била санирана со четири конци.
Благодарност до лекарите и апел до рекреативците
Перо Камиказа јавно им се заблагодари на медицинските тимови за брзата реакција и професионалната грижа што ја добил.
Воедно, упати апел до сите велосипедисти и рекреативци кои го користат Кејот на Вардар да бидат внимателни и да ги почитуваат правилата за движење, со цел да се избегнат слични несреќи.
„Сполај ти, Боже, што ми даваш шанса да продолжам. Се гледаме набрзо на Кеј“, порача Георгиевски.
И покрај непријатното искуство, музичарот најави дека наскоро повторно ќе се врати на велосипед, а потврди и дека ќе настапи на концертот закажан за 23 октомври во салата „Јане Сандански“.
