Повеќе пожари вечерва во Скопскиот регион, три жаришта сè уште активни

20/07/2026 21:32

Повеќе пожари на отворен простор биле пријавени вечерва во Скопскиот регион.

До 20 часот гореле претежно сува и ниска вегетација, како и еден овоштарник.

По сите пријави биле активирани екипите на Бригадата за противпожарна заштита на Град Скопје.

Благодарение на брзата интервенција, пожарите на повеќе локации биле изгаснати или ставени под контрола.

Станува збор за пожарите во Волково, Кучевишка Бара, Катланово, Кадино, Лисиче, Бунарџик, Катлановска Сушица и Добри Дол.

На овие локации горела претежно сува и ниска вегетација.

Интервенцијата и понатаму трае на три локации.

Едното жариште е во атарот на селото Блаце, во близина на Катланово.

Пожар има и на влезот во селото Сушица, во Општина Петровец, каде гори овоштарник.

Третото активно жариште е во селото Страхојадица, во Општина Зелениково. Таму гори сува трева.

Од Центарот за управување со кризи информираат дека состојбата во најголем дел од Скопскиот регион е ставена под контрола.

ЦУК остварил координација и со Дирекцијата за заштита и спасување.

Целта е да се обезбедат дополнителна поддршка и надзор на терен до целосно ликвидирање на преостанатите жаришта.