Со дефиле и почит кон хероите, Кочани го одбележа Илинденскиот коњанички собир
Со свечено дефиле низ градските улици, полагање цвеќе и богата културно-уметничка програма, денеска во Кочани се одржа традиционалната манифестација „Илинденски коњанички собир“ – Кочани 2026. Настанот ги обедини љубителите на македонската традиција и историја во пресрет на големиот празник Илинден.
Марш низ градот и почит во „Алејата на ангелите“
Во организација на Здружението „Кочанска коњаница – Осоговски Елит“, во соработка со Битолската коњаница „Галоп“ и со поддршка од Општина Кочани, коњаниците тргнаа од Градскиот стадион „Никола Мантов“ и продефилираа низ градските улици.
Една од најемотивните точки на маршот беше посетата на Градските гробишта, каде во „Алејата на ангелите“ беше положено свежо цвеќе во чест на загинатите сограѓани во трагедијата во дискотеката „Пулс“.
Културна програма во Паркот на Револуцијата
По завршувањето на дефилето, манифестацијата продолжи во Паркот на Револуцијата, каде беше организирана културно-уметничка програма.
Посетителите имаа можност да уживаат во настапите на Оркестарот на изворна музика и Фолклорниот ансамбл „Мугри“, кои со традиционални песни и ора ја збогатија атмосферата.
Патувањето продолжува до Мечкин Камен
Во овогодинешниот Илинденски коњанички марш учествуваат десетина коњаници од Кочани и Битола.
Нивната маршрута ќе продолжи во наредните денови, а традиционално ќе заврши на Мечкин Камен во Крушево, каде ќе се одбележи националниот празник Илинден.
