Денеска се празнува Света великомаченичка Марина – Огнена Марија

30/07/2026 8:25

Света великомаченичка Марина, во народот позната и како Огнена Марија, потекнувала од Антиохија Писидиска и била родена во незнабожечко семејство.

Уште како девојче слушнала за Господ Исус Христос, за Неговото воплотување, чудата, распнувањето и воскресението. Нејзиното срце се исполнило со љубов кон христијанската вера, поради што решила да не се мажи и целосно да Му се посвети на Христос.

Таткото се откажал од неа поради верата

Нејзиниот татко ја замразил затоа што станала христијанка и престанал да ја смета за своја ќерка.

Кога царскиот намесник Олимвриј дознал за нејзината вера, побарал од Марина да му стане жена. Откако таа го одбила, тој ѝ наредил да им се поклони на идолите.

Марина одбила да принесе жртва и порачала дека честа што Му припаѓа на Создателот нема да им ја даде на безживотните идоли.

Поради тоа била изложена на тешки страдања, а потоа била фрлена во затвор.

Според житието, во затворот ѝ се случило чудо

Додека се молела во затворот, според преданието, пред неа се појавил ѓаволот во облик на страшна змија. Светителката се прекрстила, по што змијата исчезнала.

Потоа затворот го осветлила силна небесна светлина. Се појавил блескав крст и бела гулабица, од која се слушнал глас дека дошол денот на нејзината радост.

Со Божја сила, Марина била исцелена од раните и болките. Следниот ден повторно била изложена на мачења, но останала цврста во верата.

Осудена на смрт во времето на Диоклецијан

На крајот, Марина била осудена на смрт со меч. Според црковното предание, пред смртта ѝ се јавил Господ Исус Христос со ангели.

Пострадала во времето на римскиот цар Диоклецијан, а Црквата ја почитува како голема маченичка и сведок на христијанската вера.

Една рака од света Марина се чува во манастирот Ватопед на Света Гора. Дел од нејзините мошти се наоѓаат и во манастир посветен на светителката на планината Ланга во Албанија, над Охридското Езеро.