Директорот на затворот во Шутка, Бобан Утковски поднесе оставка, вели дека причините се лични

10/09/2026 11:14

Директорот на затворот во Шутка поднесе оставка и за ТВ 24 потврди дека од функцијата се повлекува поради лични причини.

Бобан Утковски веќе ја доставил оставката до Владата, која треба да ја разгледа на една од следните седници.

Утковски беше именуван за вршител на должноста директор на КПУ Затвор Скопје на крајот на јули 2024 година.

Засега нема дополнителни информации дали Владата веќе разгледува негов наследник на функцијата.

Една од последните изјави на Утковски што предизвика поголемо внимание во јавноста беше поврзана со безбедноста во затворот.

Тогаш тој изјави дека Затворот „Скопје“ може да ја гарантира безбедноста на секој штитеник.

Изјавата следуваше по одлуката поранешниот вицепремиер Артан Груби да заврши во куќен притвор.

Образложението беше дека надлежните безбедносни институции процениле оти неговата безбедност во затворот во Шутка би можела да биде загрозена.

Утковски тогаш порача дека „Затворот ‘Скопје’ не е мексикански картел“ и дека установата може да обезбеди безбедност и за Груби.

Директорот на затворот во Шутка поднесе оставка по нешто повеќе од две години на функцијата, а како причина јавно ги наведе личните причини.