Жртвите од Богданци имаат заедничко минато: 17-годишната девојка пријавила насилство уште во септември, полицијата го привела 21-годишникот

Жртвите од Богданци имале заедничко минато, а 17-годишната девојка уште во септември пријавила физичко насилство од 21-годишниот В.Г. Полицијата тогаш го привела момчето и го известила надлежното јавно обвинителство. Ова го потврдува полицискиот билтен од 1 октомври, објавен повеќе од еден месец пред трагедијата.

Двете лица беа пронајдени мртви на 3 ноември, во близина на опожарен автомобил кај местото викано „Ичева чешма“ во Богданци. Причините за нивната смрт и околностите на трагедијата се предмет на истрага.

Девојката пријавила насилство на 30 септември

Според полицискиот билтен од 1 октомври, 21-годишниот жител на Богданци бил приведен по пријава за физички напад врз неговата малолетна девојка.

Нападот, според пријавеното, се случил на 30 септември, околу 21 часот, во домот на момчето.

Полицијата постапила по пријавата и го лишила од слобода 21-годишникот во 1:10 часот по полноќ на 1 октомври.

„Полициски службеници лишија од слобода 21-годишен жител на Богданци. Според пријавеното, тој на 30.09.2026 околу 21:00 часот во неговиот дом физички ја нападнал неговата 17-годишна девојка. За настанот е известен јавен обвинител од Основното јавно обвинителство Гевгелија, а по документирање на случајот ќе биде поднесена соодветна пријава“, стои во известувањето на МВР.

Полицијата уште тогаш го известила Основното јавно обвинителство Гевгелија за пријавеното насилство.

Засега нема информации каков бил понатамошниот тек на постапката и дали биле преземени дополнителни мерки.

Неофицијални информации за претходни закани и напад со нож

Според дополнителни неофицијални информации, 17-годишната девојка разговарала со лица од своето опкружување за насилството што наводно го трпела.

Таа, според овие сознанија, споменувала и закани од страна на момчето.

Се наведува и наводен инцидент во кој 21-годишникот се обидел да ја нападне со нож. Девојката, според истите информации, успеала да избега низ прозорец.

Овие тврдења засега не се официјално потврдени од надлежните институции. Не е познато дали наводниот напад со нож бил пријавен во полиција.

Еден месец подоцна, двајцата пронајдени мртви

На 3 ноември, околу 18:40 часот, жител на Богданци пријавил опожарен автомобил на местото викано „Ичева чешма“, во Горно Село.

Во близина на автомобилот било забележано лице што не давало знаци на живот.

Полициските службеници го пронашле 21-годишниот В.Г. од Богданци. Неговата смрт ја констатирала екипа на Итната медицинска помош.

По локализирањето на пожарот, во автомобилот било пронајдено уште едно опожарено тело, на 17-годишната девојка.

Двете тела биле предадени на обдукција по наредба на јавен обвинител од Основното јавно обвинителство Гевгелија.

Според претходно објавените неофицијални информации, се истражуваат сомнежи дека момчето најпрво ја убило девојката, потоа го запалило автомобилот, а по ова си го одзело животот.

Оваа верзија за редоследот на настаните сè уште не е официјално потврдена. Причините за смртта треба да бидат утврдени со обдукцијата и другите истражни дејствија.

Нови детали за трагедијата во Богданци: Сомнежи за убиство и самоубиство, познати возраста на девојката и идентитетот на 21-годишникот

Што презеле институциите по пријавата за насилство?

Информацијата дека девојката пријавила физичко насилство повеќе од еден месец пред трагедијата отвора сериозни прашања за постапувањето на институциите.

Полицискиот билтен потврдува дека 21-годишникот бил приведен и дека обвинителството било известено.

Сепак, засега нема информации дали против него била поднесена пријава, дали биле побарани заштитни мерки и какви одлуки биле донесени.

Не е познато ниту дали надлежните институции биле информирани за други евентуални закани или случаи на насилство.

Останува да се утврди дали претходно пријавеното насилство било поврзано со трагичниот настан и дали постоеле дополнителни околности што барале институционална интервенција.

Жртвите од Богданци имале заедничко минато обележано со пријава за партнерско насилство. Сега истрагата треба да ги разјасни околностите на нивната смрт, но и да даде одговори за постапувањето по претходната пријава.