МВР: 2 Ноември, Ден за ставaње крај на неказнивоста за злосторства врз новинарите
02/11/2025 16:11
Министерството за внатрешни работи денеска го одбележува 2 Ноември – Меѓународниот ден за ставање крај на неказнивоста за злосторства против новинарите, преку кампањата „Новинарите се важни“, што ја спроведува Советот на Европа во соработка со националните фокусни точки.
Помошник-министерот за односи со јавноста, Мухамед Исмаиљи, во изјава нагласи дека секој напад врз новинар претставува напад врз слободата на изразување и правото на граѓаните да бидат информирани.
„Секој напад врз новинар е напад врз слободата на изразување и пристапот на луѓето до информации. Затоа, борбата против неказнивоста не е само за одбрана на новинарите, туку и на вредностите на демократијата“, истакна Исмаиљи.
Кампањата „Новинарите се важни“, започната во 2023 година, создаде мрежа што ги поврзува новинарите, полицијата, обвинителството и институциите за унапредување на безбедноста и меѓусебната доверба. Како резултат, во Македонија се изработени два прирачника за безбедност на новинарите, формиран е Национален комитет за нивна заштита, а МВР објави Регистар на напади врз новинари на својата интернет страница.
Исмаиљи потсети дека безбедноста на новинарите е еден од врвните приоритети на МВР, а досегашните активности веќе даваат резултати.
Советот на Европа и националните фокусни точки остро ги осудуваат сите форми на насилство, незаконско притворање и убиства на новинари, особено во зони на конфликти. Тие апелираат земјите-членки да ги обноват своите обврски за заштита на новинарите и за спроведување независни и ефикасни истраги за сите напади.
Во продолжение на петгодишната кампања, приоритет ќе биде намалување на бројот на напади и закани, подобрување на заштитните механизми и зголемување на довербата меѓу новинарите, граѓаните и институциите.
На овој ден, од МВР потсетуваат дека му оддаваме почит на секој новинар кој ја платил највисоката цена за вистината, со порака дека нивната храброст нема да биде залудна.
