Денес продолжува судењето за трагедијата во „Пулс“: Еве каде може да го следите во живо
04/12/2025 9:35
Во судницата во Идризово денеска продолжува судењето за трагедијата во дискотеката „Пулс“ во Кочани, пожар во кој загинаа 63 лица, меѓу кои и деца, а над 200 беа повредени. По претходното рочиште, на кое сите обвинети изјавија дека не се чувствуваат виновни, процесот денес продолжува со воведни зборови на одбраната.
Неколку обвинети упатија сочувство кон семејствата на жртвите, но не признаа одговорност за делата што им се ставаат на товар, меѓу кои „тешки дела против општата сигурност“.
Рочиштето може да се следи во живо преку МИА YouTube и МИА Facebook.
На минатото рочиште одбраната на повеќемина обвинети – сопственикот Дејан Јованов, директорот на „МММ кафe“ Митко Стојанов, обезбедувачот Стојанчо Димитриев и сопственикот на објектот Гроздан Милковски – ги оспори обвиненијата.
Според адвокатите:
обвинетите не презеле дејствија што би имале директна врска со пожарот,
поседувале валидна документација,
трагедијата е резултат на институционални пропусти, а не на нивна вина.
Сопственикот Дејан Јованов изјави дека „и по девет месеци затвор не може да поверува во трагедијата“, додавајќи сочувство и дека како родител секогаш се грижел за безбедноста.
Одбраната на третообвинетиот Михаил Јованов тврди дека тој е обвинет само затоа што е син на сопственикот, без конкретни докази или опис на дејствие.
Ставови на останатите обвинети
Адвокатот на Митко Стојанов посочи дека нема причинско-последична врска меѓу неговите постапки и пожарот.
Одбраната на Гроздан Милковски наведе дека закупниот договор бил законит и дека сопственикот не учествувал во адаптацијата на објектот.
Проектантката Милка Едровска објасни дека била ангажирана исклучиво за сообраќајно решение за паркинг, а не за комплетен проект, и дека нејзината фирма нема врска со адаптацијата на магацинот во дискотека.
Обвинителството најавува обемни докази
Тим од 15 јавни обвинители оцени дека клубот „Пулс“ бил „смртоносна стапица уште од почетокот“, резултат на систематска негрижа, игнорирани прописи и институционални пропусти.
На обвинителна клупа седат 37 лица: сопственици, управители, инспектори, поранешни градоначалници, обезбедувачи и државни службеници.
Судењето продолжува, а јавноста внимателно го следи овој процес, кој се смета за еден од најголемите и најкомплексни случаи во поновата правосудна историја.
Во судницата во Идризово денеска продолжува судењето за трагедијата во дискотеката „Пулс“ во Кочани, пожар во кој загинаа 63 лица, меѓу кои и деца, а над 200 беа повредени. По претходното рочиште, на кое сите обвинети изјавија дека не се чувствуваат виновни, процесот денес продолжува со воведни зборови на одбраната.
