Ахмети со заканувачки пораки и нови услови: ДУИ нема да влезе во идна влада без „План А“, во спротивно се активира „План Б“
23/12/2025 6:47
Лидерот на Демократска унија за интеграција, Али Ахмети, денеска на брифинг со новинарите упати остри и недвосмислени закани до политичките противници, но и до критичарите во рамки на сопствената партија. Тој најави воведување нови, построги услови за учество на ДУИ во која било идна влада и предупреди дека, доколку политичките процеси не се одвиваат според таканаречениот „План А“, не ја исклучува можноста за активирање на „План Б“.
Во свој препознатлив стил, Ахмети ја потенцираше сопствената политичка тежина и поддршката што, како што рече, ја има меѓу граѓаните. „Ако излезам на улица, никогаш нема да се вратам дома. Јас не сум претставник на мачки, туку на лавови“, изјави тој, порачувајќи дека зад него стои сериозна политичка и општествена сила.
Тој се осврна и на своето политичко минато, истакнувајќи дека никој подобро од него не го познава национализмот во земјата. Според Ахмети, неговата улога во клучните историски процеси на крајот на минатиот и почетокот на овој век била суштинска, а со години активно учествувал во креирањето на политичките текови.
🔴 „Црвени линии“ за идни коалиции
Во однос на идните коалициски комбинации, Ахмети постави јасни услови. Тој побара склучување нов Национален договор за развој, кој би вклучувал системски измени, меѓу кои и воведување двојно мнозинство (Бадентеров принцип) при изборот на Владата, како и негова примена во одлучувањето на Уставниот суд. Според него, овие услови ќе бидат неопходни за учество на ДУИ во која било идна власт.
Ахмети оцени дека Охридскиот рамковен договор е компромисно решение, но, како што рече, остава простор за понатамошна надградба.
🔹 Внатрепартиски пораки и односи во Европскиот фронт
Говорејќи за состојбите во партијата по Петтиот конгрес, лидерот на ДУИ го минимизираше незадоволството, оценувајќи дека станува збор за „две-три лица“ кои останале без функции. „Оние што си одат затоа што немаат функции, нека си одат“, порача Ахмети, додавајќи дека Абдил Селам Селами се извинил и останува дел од партијата.
Во контекст на односите во Европскиот фронт, Ахмети изјави дека со Мендух Тачи постои договор кој, според него, не му штети на Фронтот. За Зијадин Села оцени дека се обидува да изгради сопствен политички профил, бидејќи се чувствува во сенка на ДУИ, но изрази сомнеж дека ќе го поддржи Невзат Бејта за градоначалник на Гостивар.
🔹 Критики до стопанските комори и најави за нов конгрес
Ахмети упати критики и кон стопанските комори, обвинувајќи ги дека создаваат поделби и дека стојат зад интересите на олигарсите. За наредниот период најави тематски конгрес напролет, на кој, по консултации со членството, ќе се дефинира новата идеолошка насока на ДУИ.
