Вработените во „Македонски пошти“ на протест поради неисплатени плати

23/01/2026 13:22

Незадоволството на вработените во Македонска пошта денеска ескалираше во протести, откако платите за месец јануари сè уште не се исплатени. Протестите се одржаа пред поштенските објекти во повеќе градови низ државата, а синдикатот предупреди дека ситуацијата е сериозна и може дополнително да се радикализира доколку проблемот не биде решен итно.

Вработените порачаа дека нивното трпение е целосно исцрпено и дека раководството било навремено информирано за можноста од доцнење на платите, но дека одговор или решение не било понудено.

„Бевме коректни и јасни. Побаравме навремена исплата на заработеното. Наместо одговор, добивме молк. Затоа денеска сме тука“, порачаа дел од вработените на протестот.

Покрај доцнењето на платите, поштарите алармираат и за катастрофални услови за работа. Дел од поштенските објекти се без греење, со недоволна и застарена опрема, а во некои простории, според нив, сè уште има азбест, што претставува сериозен ризик за здравјето.

„Работиме во услови кои одамна не се достојни за 21 век. Немаме основни услови, а сега и платата ни доцни. Ова е навреда за секој вработен“, истакнаа учесниците на протестот.

Синдикатот предупредува дека доколку и следната плата не биде исплатена навреме, ќе се пристапи кон целосен штрајк на ниво на целата држава, што може сериозно да го загрози функционирањето на поштенските услуги.

Засега, од менаџментот на Македонска пошта нема официјално соопштение за причините за доцнењето на платите, ниту пак информација кога вработените ќе ги добијат своите примања.

Протестите испраќаат јасна порака – трпението на поштарите е при крај, а институционалната неодговорност повеќе нема да се премолчува.