Низа апсења низ земјава: Пијан возач без дозвола нападнал полицаец, одземени повеќе возила

Во текот на 3 и 4 февруари, полициските служби спроведоа повеќе интервенции низ државата, при што беа лишени од слобода неколку лица поради нарушување на јавниот ред и мир и сериозни прекршоци во сообраќајот.

На 4 февруари околу 00:30 часот, на улицата „Едип Папранику“ во Дебар, полициски службеници од Министерство за внатрешни работи ги лишиле од слобода А.Л. (28) и А.Л. (23), двајцата од Дебар. Тие претходно учествувале во физичка пресметка со повеќе лица, при што 28-годишниот А.Л. со тврд предмет нападнал полициски службеник за време на службена интервенција, а потоа се дале во бегство.

Набргу потоа било запрено патничко возило „опел корса“, управувано од А.Л. (28), при што било утврдено дека возачот бил под дејство на алкохол со 1,65 промили алкохол во крвта и дека не поседувал возачка дозвола. Двете лица се приведени, а возилото е одземено.

Претходната вечер, на 3 февруари во 22:40 часот, на излезот од селото Ратавица кон Трипатанци, пробиштипско, полицијата го лишила од слобода Ж.К. (57) од село Трипатанци, кој управувал возило „југо“ без регистарски ознаки и без возачка дозвола. По насоки на јавен обвинител, возилото е привремено одземено.

Истиот ден во 23:00 часот, на булеварот „Благоја Тоска“ во Тетово, приведен е А.И. (43) од Тетово, кој управувал „фолксваген голф“ и покрај активна забрана за управување со моторно возило. Возилото е одземено за понатамошна постапка.

Дополнително, во текот на 3 февруари, полициски екипи извршија апсења и во Велес, Кавадарци и Кичево, каде беа приведени повеќе возачи кои управувале возила без да се стекнат со право на управување. Во сите случаи, по насоки на јавен обвинител, возилата и возачките документи се одземени.

По целосно документирање на настаните, против сите инволвирани лица ќе бидат поднесени соодветни кривични и прекршочни пријави.

Share on Facebook

Tweet

Follow us

Save