Јакимовски со критики за првите 100 дена од локалната власт во Карпош: Наместо да броевме денови, ќе броевме проекти

Поранешниот градоначалник на Општина Карпош, Стевчо Јакимовски, преку објава на социјалните мрежи упати критики до актуелната локална власт, оценувајќи дека во првите 100 дена од мандатот нема видливи резултати и реализирани проекти.

Во својот статус, Јакимовски наведува дека доколку победел на последните локални избори, граѓаните веќе ќе имале завршени инфраструктурни и образовни проекти наместо, како што вели, да се бројат деновите од мандатот.

Проекти што, според него, ќе биле реализирани

Тој посочува дека градинката „Мајски Цвет“ во Тафталиџе 1 досега ќе била пуштена во употреба, а градинката „Пролет“ кај населбата Канела ќе се наоѓала во завршна фаза, со можност децата да добијат нов простор уште на 1 мај.

Според Јакимовски, спортската сала во основното училиште „Димов Хаџи Димов“ веќе ќе била ставена во функција, а повеќе улици во Карпош – меѓу кои Петар Чаулев, Софиска, Џумајска, Јуриј Гагарин, Загребска, Атинска, Бранислав Нушиќ и Трифун Бузев – ќе биле целосно реконструирани.

Дополнително, тврди дека ќе биле решени канализациските проблеми во Бардовци и на улицата Ловќенска, како и безбедносните прашања поврзани со потпорниот ѕид на улицата Загребска. Проектите за катни гаражи во Карпош 1 и Карпош 2, според него, веќе ќе биле подготвени со распишани тендери.

Порака до актуелната власт

„Не е прашањето во деновите, туку во посветеноста. Кој знае – прави. Кој не знае – брои“, напиша Јакимовски, оценувајќи дека начинот на кој започнале првите 100 дена ќе го одреди и остатокот од мандатот.

Неговата објава предизвика поделени реакции на социјалните мрежи – дел од граѓаните ја поддржаа критиката, додека други побараа споредба со реализираните проекти од неговиот претходен мандат.

Share on Facebook

Tweet

Follow us

Save