Над 150 Македонци побарале помош за евакуација од Блискиот Исток

02/03/2026 9:14

Расте бројот на македонски државјани кои се затечени во загрозените подрачја на Блискиот Исток. Од Министерство за надворешни работи и надворешна трговија за МИА информираат дека досега повеќе од 150 македонски граѓани ги контактирале амбасадите во Тел Авив, Доха и Абу Даби во врска со можностите за евакуација.

Од МНР наведуваат дека со сите пријавени се одржува постојан контакт и доколку се изјаснат за евакуација, ќе се преземат подготвителни активности за нивна евентуална асистенција и безбедно враќање во земјата.

Кризен штаб во функција

Поради актуелната безбедносна состојба, во Министерството од завчера функционира кризен штаб кој е достапен 24 часа дневно за сите информации и поддршка на граѓаните.

„Министерството, преку дежурниот телефонски број и дипломатско-конзуларните претставништва, останува целосно на располагање. Ги повикуваме сите наши државјани кои се наоѓаат во земјите од регионот доследно да ги почитуваат упатствата на локалните безбедносни органи“, информираат од МНР.