Клучен доказ на судењето за самоубиство во Тафталиџе
08/04/2026 15:47
Стојанче ја удира Ивана неколку часа пред смртта откриваат снимки од „Сејф Сити“
На снимката се гледа физички напад врз Ивана на 2 март 2026 година, само неколку часа пред таа и нивната шестгодишна ќерка Катја да го загубат животот. Обвинителството видеото го користи како клучен доказ за континуирано насилство.
Напад во близина на гимназијата „Нова“
Со изведување на видеоснимка како клучен доказ, денеска во судница продолжи судскиот процес против Стојанче Јовановски, кој е обвинет дека ја навел на самоубиство сопругата Ивана. Таа трагично го загуби животот заедно со нивната шестгодишна ќерка Катја.
Станува збор за снимка од системот „Сејф Сити“, на која, според Обвинителството, е регистриран настан што се случил на 2 март 2026 година околу 11 часот – само неколку часа пред трагедијата во скопската населба Тафталиџе.
Настанот се одвива во близина на гимназијата „Нова“, каде претходно Ивана се сретнала со сведокот Мартин Саздов.
Шлаканици и повлекување
На видеото јасно се гледа физички напад врз Ивана. Според презентираните кадри, обвинетиот во повеќе наврати ѝ удира шлаканици, додека таа се обидува да се повлече и да ја избегне конфронтацијата.
Во 11:07 часот, Ивана влегува во кадарот и се среќава со обвинетиот на тротоарот. Тој реагира вознемирено, гестикулира и ја удира со рака по лицето. Таа се повлекува, а во еден момент седнува на ограда, видно вознемирена и држејќи се за лицето.
Интервенција на сведок
Неколку минути подоцна, расправијата продолжува. Во 11:12 часот, Јовановски повторно ја удира Ивана. Во тој момент, на местото се враќа сведокот Саздов, кој се обидува да ја смири ситуацијата, застанувајќи меѓу нив и оттурнувајќи го обвинетиот.
И покрај обидот за интервенција, од снимката се гледа дека Јовановски продолжува со агресивно однесување и повторно физички ја напаѓа сопругата.
Клучен доказ за злоупотреба
Обвинителството смета дека видеото е значаен доказ кој ја потврдува континуираната физичка и психичка злоупотреба врз жртвата, непосредно пред трагичниот исход.
Судењето продолжува со изведување на дополнителни докази и сведочења.
