Левица: Мицкоски ја менува реториката, ама сметките за струја ја кажуваат вистината

01/06/2026 14:03

Политичката партија Левица обвини дека ветувањата на премиерот Христијан Мицкоски за поевтина струја не се претвориле во реалност и дека граѓаните денес ја чувствуваат вистината преку месечните сметки.

Од Левица потсетуваат дека ВМРО-ДПМНЕ во 2020 година организираше протести против поскапување на струјата од 7,4 проценти. Тогаш, како што велат, секое покачување било претставувано како доказ дека системот работи против граѓаните.

Левица: Ветувањата останаа само на зборови

Од партијата велат дека една година подоцна Мицкоски ветувал поевтина струја, модернизација на РЕК Битола и Осломеј, како и стабилно домашно производство.

Според Левица, по доаѓањето на власт наместо конкретни резултати имало само нови најави, нови модели и нови прес-конференции, додека товарот повторно останал кај граѓаните.

Наместо поевтинување, граѓаните добиле исти проблеми

Левица потсетува и на изјавите од јуни 2024 година, кога Мицкоски како мандатар најавувал намалување на цената на струјата од јануари 2025 година и за домаќинствата и за индустријата.

Од партијата тврдат дека наместо тоа, граѓаните денес се соочуваат со ист систем, исти монополи и ист начин на префрлање на трошоците врз домаќинствата.

Бараат промена на целиот модел

Според Левица, проблемот не е само во една одлука, туку во целиот енергетски модел. Тие тврдат дека приватниот снабдувач има сигурна маржа, Регулаторната комисија ги одобрува трошоците, а државниот енергетски сектор се турка во долгови.

Партијата предлага ЕСМ Продажба да стане постојан законски универзален снабдувач, да има реорганизација на енергетскиот сектор со стручни кадри, оптимизација на производниот микс и воведување повеќетарифен систем со зимски и летен режим.

Бараат и целосна транспарентност

Левица предлага и гасификација на ТЕЦ Неготино, како и јавно објавување на сите признати трошоци на ЕСМ, ЕВН и РКЕ.

Според нив, граѓаните имаат право да знаат за што точно плаќаат. Од партијата порачуваат дека сметките за струја ја кажуваат вистината и дека секое одолговлекување на конкретни мерки значи нов товар за домаќинствата.