По четири години чекање: Пациент доби ново срце и нова шанса за живот
По четири години неизвесност и надеж, 52-годишен пациент кој од 2021 година се наоѓал на Националната листа за трансплантација, доби ново срце и нова шанса за живот. Веста ја соопшти Министерството за здравство.
Хумана одлука на семејство во најтешкиот момент
Министерството за здравство истакна дека зад успешната трансплантација стои хумана и несебична одлука на едно семејство кое, во најтешките моменти од својот живот, решило да подари надеж и да спаси други човечки животи.
„Едно семејство, во најтешкиот момент од животот, донесе одлука да спаси животи. Срцето не застана. Само продолжи да бие, во градите на некој друг“, се вели во објавата на Министерството.
„Повик што промени сè“
Од Министерството за здравство со емотивна порака го опишаа моментот на трансплантацијата:
„Четири години чекање. Еден повик и момент што промени сè. Срце што не замолчи, туку продолжи да бие.“
Новото срце, како што наведуваат, од денеска пулсира во градите на пациентот, претставувајќи симбол на љубов, хуманост и солидарност.
Важноста на органодарителството
Од Министерството порачуваат дека ова е уште еден доказ за значењето на органодарителството и можноста преку една одлука да се спасат повеќе животи.
Овој чин, како што велат, уште еднаш ја потврдува важноста на трансплантациската програма и хуманоста на семејствата кои, и покрај сопствената загуба, одлучуваат да подаруваат живот на други луѓе.
