Спасени тројца планинари на Шар Планина, еден бил со влошена здравствена состојба

12/07/2026 15:40

Спасени се тројца планинари на Шар Планина, откако еден од нив пријавил дека му се влошила здравствената состојба, информира МВР.

Случајот бил пријавен на 11 јули 2026 година, во 18:46 часот, во СВР Тетово.

А.Ч. од село Жеровјане побарал помош за него и за уште две лица, Н.М. од село Слатино и Б.А. од село Глоѓи.

Заглавиле на пат кон Шар Планина

Според пријавата, тројцата со возило пристигнале до местото викано „Три води“, во атарот на село Теарце.

Потоа пешки се упатиле кон Шар Планина.

Меѓутоа, тие останале заглавени, а во меѓувреме на А.Ч. одеднаш му се влошила здравствената состојба.

Тој пријавил болки во градите и отежнато дишење.

Веднаш по добиената пријава биле известени Полициското одделение Теарце и Територијалната противпожарна единица лоцирана во село Лешок.

Н.М. и Б.А. успеале да го симнат А.Ч. до местото викано „Бачило“.

Таму биле пречекани од спасувачката екипа на Територијалната противпожарна единица.

По пронаоѓањето, групата заедно со спасувачите пешки се спуштила до нивното возило.

Во 20:40 часот, кај местото „Три води“, лицата биле прифатени од полициски службеници од ПО Теарце.

Потоа биле безбедно спроведени до регионалниот пат кај село Лешок.

Таму пристигнала екипа на Итна медицинска помош од Тетово.

А.Ч. на 12 јули 2026 година, во 00:55 часот, со амбулантно возило бил пренесен во Клиничката болница Тетово за укажување лекарска помош.