Обвинителството поднесе обвинение против 34 физички и 3 правни лица за трагедијата во дискотеката „Пулс“ во Кочани, каде загинаа 62 лица, вклучувајќи и шест деца. Според обвинението, со години се кршеле закони, се прикривале неправилности и објектот работел и покрај тоа што не ги исполнувал минималните безбедносни услови
Обвинети се сопственици, членови на семејства, архитектка, поранешни градоначалници, инспектори, обезбедувачи и државни функционери, како дел од системски колапс кој доведе до трагедијата.
За 11 лица, меѓу кои двајца поранешни министри и ексдиректори, постапката е запрена поради недоволно докази. Постапките се привремено прекинати и за некои обвинети поради здравствени причини.
Тројца сопственици и управители вршеле угостителска дејност без исполнување на техничките услови, без дозвола за реконструкција, без елаборати за заштита од пожари и без планови за спасување. Објектот бил пренаменет и реконструиран незаконски, користејќи несоодветни материјали, кои го олесниле ширењето на пожарот.
Братот на газдата продавал влезници, дозволувајќи прекумерен број посетители и влез на малолетни, свесен за опасностите. Архитектката изготвила лажен проект за пренамена на објектот за да се добие нелегална лиценца.
Градежни инспектори не вршеле надзор, не отстраниле неправилности и овозможиле објектот да работи како кабаре, иако тоа не било дозволено според урбанистичкиот план. Поранешните градоначалници не реагирале и не го известиле надлежните за незаконското работење.
Обвинети се и агенцијата за обезбедување и четворица нивни припадници, кои не спречиле влез на малолетни и пиротехника. Обвинети се и директори и инспектори од Дирекцијата за заштита и спасување, кои не презеле мерки и не организирале инспекции, дозволувајќи опасен објект да функционира.
Пет државни службеници, меѓу кои двајца министри и генерален секретар, се обвинети за издавање лиценци и неадекватен надзор. Дел од нив се ослободени поради недоволни докази. Еден службеник добил мито и изработил лажни лиценци.
Пиротехниката, набавена и употребена незаконски од музичката група и син на газдата, предизвикала пожар кој брзо се проширил поради запаливите материјали и недостатокот на безбедносни излези. Масовната паника и препречените излези довеле до голем број жртви.
Сите обвинети се товари за тешки дела против општата сигурност поради катастрофалниот пожар со 62 жртви.
