Просечната нето-плата во Македонија порасна на 45.961 денар
21/01/2026 15:17
Просечната месечна исплатена нето-плата по вработен во ноември 2025 година изнесувала 45.961 денар, соопшти Државен завод за статистика.
Во споредба со ноември 2024 година, просечната нето-плата е повисока за 9,4 отсто, што укажува на континуиран раст на примањата кај вработените во повеќе клучни сектори на економијата.
Според податоците на Државниот завод за статистика, најголем придонес кон годишниот раст има зголемувањето на платите во следните сектори:
Административни и помошни услужни дејности – раст од 16,5 %
Дејности на здравствена и социјална заштита – раст од 11,1 %
Трговија на големо и трговија на мало; поправка на моторни возила и мотоцикли – раст од 10,9 %
На месечно ниво, односно во однос на октомври 2025 година, исто така е забележано зголемување на просечната нето-плата во неколку сектори. Најизразен раст е евидентиран во:
Јавна управа и одбрана; задолжително социјално осигурување – 3,5 %
Административни и помошни услужни дејности – 2,2 %
Трговија на големо и трговија на мало; поправка на моторни возила и мотоцикли – 1,2 %
Податоците укажуваат дека растот на платите е резултат на комбинирани фактори, вклучително и корекции на платите во јавниот сектор, зголемена побарувачка за работна сила и притисоци од инфлацијата, кои и понатаму влијаат врз економските движења во државата.
