МВР појаснува: Во кои случаи возилото се смета дека е управувано без возачка дозвола и кога се одзема
05/02/2026 22:50
Возењето моторно возило без возачка дозвола претставува кривично дело, а Министерството за внатрешни работи има законска можност, по наредба на Основно јавно обвинителство, да го одземе возилото со кое е сторен прекршокот или кривичното дело.
Ова појаснување, според информациите објавени од Плусинфо, доаѓа од извор во Министерство за внатрешни работи, по бројните дилеми во јавноста и на социјалните мрежи дали возилата управувани без возачка дозвола се одземаат привремено или трајно.
Од МВР појаснуваат дека одземањето на возилото во вакви случаи е привремена мерка, додека за трајна конфискација е неопходна правосилна судска пресуда. „За трајно конфискување на одземено возило мора да постои конечна одлука од надлежен суд“, нагласува изворот.
Кога се смета дека возилото е управувано без дозвола?
Според законската дефиниција и појаснувањето од МВР, за управување без возачка дозвола се смета кога:
возачот никогаш не положил возачки испит,
возачката дозвола му е трајно одземена,
возачот управува возило во период кога му е изречена привремена забрана за управување со моторно возило.
Во сите овие случаи, полицијата има основ да постапи, да го лиши лицето од слобода доколку постојат законски услови и да го одземе возилото за понатамошна постапка.
Од МВР апелираат граѓаните да не подлегнуваат на дезинформации и да ги почитуваат сообраќајните прописи, потенцирајќи дека мерките имаат за цел зголемување на безбедноста во сообраќајот и спречување на тешки сообраќајни несреќи.
Возењето моторно возило без возачка дозвола претставува кривично дело, а Министерството за внатрешни работи има законска можност, по наредба на Основно јавно обвинителство, да го одземе возилото со кое е сторен прекршокот или кривичното дело.
