Трамп планира посета на Кина во април: Тајван и трговијата во фокусот на односите со Пекинг

10/02/2026 12:05

Американскиот претседател Доналд Трамп се обврзал да ја посети Кина во април, по средбата со кинескиот лидер Си Џинпинг што се одржа во Јужна Кореја минатата есен. Сепак, Белата куќа досега официјално не ги соопшти точните датуми на патувањето, а американски официјален претставник изјави дека термините сè уште не се конечни.

Во меѓувреме, кинеската амбасада во Вашингтон не одговори на барањата за коментар. Минатата недела, Трамп и Си оствариле телефонски разговор, при што биле отворени прашања поврзани со трговијата и меѓународните конфликти, што се толкува како вовед во можна нова средба меѓу двајцата лидери.

Трамп изјави дека за време на разговорот било отворено и прашањето за Тајван, тема која, според јавните информации, не била дел од нивната средба во Јужна Кореја во октомври. Од Министерство за надворешни работи на Кина соопштија дека Си Џинпинг потенцирал оти Тајван е најчувствителното и најважно прашање во односите меѓу Кина и САД, нагласувајќи дека станува збор за кинеска територија и дека Пекинг нема да дозволи негово одвојување.

Во соопштението беше упатено и предупредување до Соединетите Американски Држави внимателно да постапуваат во врска со продажбата на оружје на Тајван. Кина претходно изрази незадоволство поради американската одлука за продажба на оружје во вредност од 11 милијарди долари, одобрена во декември, по што кинеската армија спроведе дводневна воена вежба со боева муниција, за која беше соопштено дека симулирала ненадеен напад врз островот.

Според американскиот министер за финансии Скот Бесент, Си Џинпинг би можел да го посети Трамп во текот на летото, во Вашингтон или во Мар-а-Лаго. Исто така, можно е двајцата лидери да се сретнат на Г20 самитот во Мајами, како и на собирот на Азиско-пацифичка економска соработка во Шенжен.

Првата недела од април симболично се совпаѓа со годишнината од воведувањето на царините на Трамп, кога на таканаречениот „Ден на ослободувањето“ беа воведени сеопфатни царини за Кина и за десетици други држави, како дел од пошироката американска трговска реформа.