Над 400 монети од времето на Филип II и Александар Македонски пронајдени на Градиште кај Црнобуки
03/07/2026 15:06
Над 400 монети се пронајдени досега во петгодишните систематски истражувања на археолошкиот локалитет Градиште кај селото Црнобуки, Битолско, информираат археолозите од Завод и музеј – Битола, пишува порталот „СакамДаКажам.мк“.
Меѓу пронајдените наоди има и монети од времето на Филип II Македонски, со претстава на богот Зевс, како и примероци од периодот на Александар Македонски.
Археолозите откриле и монети од времето на Октавијан Август, но и од повеќе антички градови, меѓу кои Пела, Тесалоника, Амфиполис и Дирахион.
Едно од најзначајните депоа на сребрени монети
Дел од монетите потекнуваат и од римскиот републикански период.
Според истражувачите, станува збор за едно од најзначајните депоа на сребрени монети од тој период во Македонија.
Наодите сè уште се анализираат, но досегашните резултати покажуваат дека локалитетот Градиште има исклучително значење за археологијата и за разбирањето на античкиот живот во овој дел од земјата.
Траги од бронзеното време до антиката
Археолозите нагласуваат дека на локалитетот се откриени траги од поширок временски опсег, вклучително и од бронзеното време.
Сè уште не е потврдено за кој антички град точно станува збор, иако постојат различни научни хипотези.
Истражувачите очекуваат дополнителните анализи да дадат попрецизни одговори за идентитетот, развојот и значењето на населбата.
Економски развиено античко населено место
Истражувањата на Градиште ги спроведува македонско-американски тим.
Досегашните наоди покажуваат дека станува збор за економски развиено населено место, во кое имало работилници, продавници и богат археолошки материјал.
Откриените монети, заедно со останатите археолошки наоди, укажуваат на активен живот, трговија и силни врски со повеќе антички центри во регионот.
Над 400 монети се пронајдени досега во петгодишните систематски истражувања на археолошкиот локалитет Градиште кај селото Црнобуки, Битолско, информираат археолозите од Завод и музеј – Битола, пишува порталот „СакамДаКажам.мк“.
