Мицкоски бара јасни европски критериуми, Кос порача дека уставните измени остануваат услов

Европската иднина на Македонија, реформите и условите за продолжување на пристапниот процес беа во фокусот на заедничката прес-конференција на премиерот Христијан Мицкоски и еврокомесарката за проширување Марта Кос.

Двајцата испратија пораки за потребата од забрзување на евроинтеграциите, но и за исполнување на обврските што стојат пред државата, објави 4news.mk.

Мицкоски: Процесот да не биде оптоварен со билатерални прашања

Премиерот Мицкоски изрази благодарност за финансиската и експертската поддршка што Македонија ја добива од Европската комисија.

Тој нагласи дека Владата останува посветена на реформите и на европскиот пат.

„Очекуваме процесот на интеграција во Европската Унија да се води според јасни критериуми, европски вредности и исполнување на реформските обврски, а не да биде оптоварен со билатерални прашања кои создаваат неизвесност и фрустрација кај македонските граѓани“, истакна Мицкоски.

„Истите правила да важат за сите“

Мицкоски порача дека довербата во процесот е клучна.

Според него, Македонија очекува истите правила да важат за сите земји кандидати.

Премиерот додаде дека Владата ќе продолжи со реформите, јакнењето на институциите, економијата и владеењето на правото.

Тој нагласи дека секое трајно решение треба да биде засновано на взаемно почитување, заштита на националното достоинство и јасна европска перспектива.

Кос: Уставните измени остануваат неопходен услов

Еврокомесарката Марта Кос оцени дека Македонија има реална можност да направи значителен исчекор кон полноправно членство во Европската Унија.

Сепак, таа потенцираше дека усвојувањето на договорените уставни измени останува неопходен услов за формално продолжување на пристапните преговори.

Кос повика на меѓупартиски консензус.

Според неа, тоа ќе ѝ овозможи на земјата целосно да го искористи актуелниот моментум во процесот на евроинтеграциите.

Придобивки преку Планот за раст

Кос посочи дека граѓаните и компаниите веќе ги чувствуваат придобивките од приближувањето кон Европската Унија преку Планот за раст.

Како следни чекори ги наведе преговорите за укинување на роамингот.

Таа ги спомена и проширувањето на можностите преку програмата „Еразмус+“, пристапот до европските иницијативи за вештачка интелигенција, здравствените програми и зајакнувањето на сајбер-безбедноста.

Полноправното членство носи поголема поддршка

Еврокомесарката истакна дека полноправното членство во Европската Унија ќе донесе поголема финансиска поддршка.

Според неа, тоа ќе значи и подобри можности за граѓаните и бизнисите.

Кос посочи дека членството би донело и дополнителни инвестиции во инфраструктурата и руралниот развој.

ЕУ очекува нова членка од Западен Балкан до 2028 година

Според Кос, Европската Унија има реални изгледи до 2028 година да добие нова членка од Западен Балкан.

Таа оцени дека Македонија треба да биде меѓу земјите кои најбрзо ќе напредуваат кон полноправно членство.

Сепак, клучниот предизвик останува исполнувањето на договорените обврски и обезбедувањето политички консензус за продолжување на процесот.