Унгарски „Икарус“ повторно го доби тендерот за новите електрични автобуси – 100 ќе бидат за Скопје

23/07/2026 18:48

Унгарската компанија „Икарус“, во заедничка понуда со ЕВН, повторно е избрана на тендерот за набавка на нови електрични автобуси.

Од вкупно 150 автобуси предвидени со набавката, 100 треба да бидат наменети за јавниот превоз во Скопје, додека преостанатите 50 ќе бидат распределени во други градови. Предвидена е и набавка на 75 станици за полнење.

„Икарус“ избран и на повторената постапка

Ова е повторена тендерска постапка, откако претходниот избор на истиот конзорциум не заврши со потпишување договор затоа што набавката пропадна.

На новиот јавен повик понуди доставиле четири групи компании. По спроведеното јавно наддавање, „Икарус“ и ЕВН повторно биле избрани како најповолен понудувач.

По завршувањето на десетдневниот рок за жалби треба да следува потпишување на договорот и почеток на процесот за производство и испорака на автобусите.

Скопје треба да добие 100 автобуси

Градоначалникот на Скопје, Орце Ѓорѓиевски, соопшти дека е завршена тендерската постапка и јавното наддавање за автобусите наменети за главниот град.

Тој посочи дека за исходот бил информиран во телефонски разговор со министерот за транспорт Александар Николоски.

Според Ѓорѓиевски, набавката треба да биде почеток на целосна обнова на возниот парк на ЈСП „Скопје“ и воведување помодерен, почист и побезбеден јавен превоз.