Историската комисија повторно без договор: Спор за Охридската архиепископија, без согласност и за Даме Груев

07/11/2026 10:49

Историската комисија Македонија-Бугарија го завршила последниот состанок во Скопје без конкретен договор, објави бугарската агенција БГНЕС.

Состанокот на Заедничката мултидисциплинарна експертска комисија за историски и образовни прашања се одржал на 5 и 6 ноември.

Според БГНЕС, повторно немало согласност околу начинот на кој Охридската архиепископија треба да биде претставена во учебниците по историја.

Нема договор и за Даме Груев

Бугарската страна, според истиот извор, повторно предложила заедничко одбележување на Даме Груев.

Во декември 2026 година се навршуваат 120 години од неговата смрт.

БГНЕС објавува дека македонските претставници не дале одговор на иницијативата.

Од друга страна, македонската страна предложила текст за заедничко одбележување на отпорот против антисемитизмот, фашизмот и националсоцијализмот, започнат во 1941 година.

Според бугарската агенција, нивните претставници не го прифатиле предлогот со образложение дека отпорот против овие идеологии се одбележува ширум Европа и не треба да биде ограничен на билатерална иницијатива.

Петти состанок годинава

Ова е петти состанок на Комисијата во текот на 2026 година.

Во извештајот на Европската комисија за Македонија се нотира дека и претходните состаноци не донеле конкретни резултати.

Работата на Комисијата останува едно од прашањата поврзани со спроведувањето на Договорот за пријателство, добрососедство и соработка меѓу Македонија и Бугарија.

Комисијата функционира од Договорот од 2017 година

Заедничката комисија е формирана врз основа на член 8 став 2 од Договорот за добрососедство, потпишан на 1 август 2017 година.

Нејзината задача е да разгледува историски и образовни прашања, да предлага препораки за учебниците и да работи на можни заеднички одбележувања на историски личности и настани.

Следниот состанок на Историската комисија Македонија-Бугарија е најавен за почетокот на декември во Софија.