Жичарата на Водно треба повторно да проработи во декември: Се реконструираат кабините, моторот е на репарација
12/11/2026 9:51
Жичарата на Водно треба повторно да биде пуштена во употреба следниот месец, најави градоначалникот на Скопје, Орце Ѓорѓиевски, по денешниот увид во работите за нејзина обнова.
Во моментов се врши реконструкција на кабините, а моторот е испратен на репарација надвор од државата. По завршувањето на работите ќе следуваат неопходните технички и безбедносни проверки.
Констатирани сериозни недостатоци
Според Ѓорѓиевски, при увидот биле утврдени сериозни недостатоци, кои тој ги поврза со долгогодишното неспроведување на неопходните големи сервиси и редовното одржување.
Тој оцени дека бил потребен обемен и темелен зафат, поради што жичарата била ставена вон функција.
„За мене, безбедноста на нашиот народ е пред сè. Тука нема компромис“, порача градоначалникот.
Се реконструираат кабините, се чека моторот
Работите во моментов се насочени кон целосна обнова на системот и реконструкција на кабините.
Се очекува и враќање на моторот кој бил испратен на репарирање во странство. Точен датум за неговото пристигнување засега не е објавен.
Повторно отворање следниот месец
Ѓорѓиевски најави дека, доколку работите и безбедносните проверки завршат според планот, жичарата треба повторно да почне да прима посетители во декември.
„Очекуваме за многу кратко време, веќе следниот месец, по завршувањето на работите и неопходните безбедносни проверки, жичарата повторно да ги пречека скопјани и гостите на нашиот град“, изјави тој.
Со повторното пуштање во употреба, жичарата на Водно треба да се врати како една од најпосетуваните туристички и рекреативни содржини во Скопје.
Жичарата на Водно треба повторно да биде пуштена во употреба следниот месец, најави градоначалникот на Скопје, Орце Ѓорѓиевски, по денешниот увид во работите за нејзина обнова.
