По 10 години затвор за тројцата обвинети за убиството пред казино во Кавадарци

Тројца кавадарчани се осудени на по 10 години затвор за убиството на 43-годишниот П.Т., кое се случи пред казино во центарот на Кавадарци во август минатата година.

Основниот суд Кавадарци ги прогласил за виновни Д.Б. (27), М.Ѓ. (36) и Д.С. (28) за кривичното дело „убиство“, сторено во соизвршителство.

На обвинетите им е продолжен притворот

Според соопштението на Судот, во текот на постапката немало признание на вина.

Кривичниот совет на тројцата обвинети им изрекол казни затвор во траење од по 10 години. Истовремено, мерката притвор им била продолжена бидејќи се прогласени за виновни.

Пресудата не е правосилна и странките имаат право на жалба.

Расправијата започнала во казиното

Според обвинението, на 27 август 2025 година, околу 5 часот наутро, во казино во Кавадарци настанала вербална расправија меѓу тројцата обвинети и жртвата.

Потоа тие излегле надвор, каде што физички го нападнале 43-годишниот маж. Нападот се случил кај задниот влез на казиното на улицата „Никола Минчев“.

Обвинителството претходно соопшти дека оштетениот бил удиран по телото и главата. Тој се обидел да се врати во казиното, но изгубил свест и починал од здобиените тешки повреди.

Првично биле осомничени за тешка телесна повреда

По настанот, Обвинителството првично отвори истрага за тешка телесна повреда со смртни последици.

Тогаш беше најавено дека ќе се врши вештачење за да се утврди дали кај осомничените постоела свест и намера да го лишат од живот оштетениот. Во таков случај беше можна преквалификација на делото во убиство.

Обвинителството побара притвор и поради опасност од бегство. Според тогашното соопштение, осомничените по нападот се оддалечиле од местото и се собрале во станот на еден од нив.

Share on Facebook

Tweet

Follow us

Save