Снег среде лето го обели Пелистер, Националниот парк со порака: „Крал на планините“
Несекојдневна глетка беше забележана на највисоките делови на Пелистер, каде среде лето падна снег. Ретката природна појава ја забележаа и ја споделија од Националниот парк Пелистер, нагласувајќи дека планината уште еднаш ја покажала својата непредвидлива природа.
Ретка летна снежна покривка
Фотографиите, направени од Оливер Тарасовски, ја прикажуваат снежната покривка на високите делови на Пелистер, иако календарски е средина на летото.
Од Националниот парк посочуваат дека ваквите временски промени не се вообичаени, но се карактеристични за високопланинските предели.
„Снег на Пелистер и во лето. Затоа Пелистер е кралот на планините во Македонија. Истовремено е убав и моќен, но и не секогаш предвидлив во своите намери со кои сака да ни покаже дека мора да го почитуваме“, порачаа од Националниот парк Пелистер.
Времето на планина брзо се менува
Од паркот потсетуваат дека временските услови на високите планини можат нагло да се променат без разлика на годишното време, поради што апелираат посетителите секогаш да бидат подготвени пред искачување.
Воедно упатија благодарност до вработените во пунктот на Националната радиодифузија на врвот Пелистер, кои редовно ги информираат за временските промени и природните појави на Баба Планина.
